Kongeleg påskedrikk :)

Eg lar sjeldan eit høve gå frå meg til å få eit  touch av kongeleg smak! I dag var det kong Olavs eksklusive sjokolade som stod på menyen.

Kong Olavs sjokoladedrikk :)

Og medan eg står og rører i sjokoladen og tenker på at han ikkje må koke fast eller koke over, minnes eg dei to søstrene Marianne og Gyda, begge godt opp i 80-åra, som høyrte til i same kyrkjelyd som meg for tjue år sidan.
Ein dag eg kom på besøk, stod det duftande sjokoladedrikk på bordet og venta på oss. "Åh, har de kokt kakao," sa eg glad. "Nei, det er sjokolade," vart eg korrigert av dei to. Og rett skal vere rett: Det er forskjell på sjokolade og kakao! Stor forskjell!
Og no like inn i påskehøgtida, vil eg og gi eit anna minne om desse to søstrene som har brent seg fast i minnet mitt. Dei burde vere eit eksempel til etterfølging for kvar og ein av oss, desse to damene. "Så lenge vi vinn å gå, skal vi i kyrkja," sa dei gjentatte gonger! Dei var sjeldan borte når kyrkjelyden var samla. Eg skulle ønske eg kunne ha den trua og truskapen som dei to søstrene hadde!

Men over til kong Olavs delikate sjokoladedrikk!
Vi var åtte stykk som skulle ha sjokolade til kveldsmaten, så eg kokte ein solid porsjon!

3 plater kokesjokolade (skal du gjere han ekstra rojal, bør det vere dronningsjokolade!)
3 dl vatn
15 dl heilmjølk

Brekk sjokoladen i bitar, og kok han i kaserolle saman med vatnet. Når sjokoladen har smelta, har du i mjølka, og varmar han opp til han blir rykande varm. Pass godt på så han ikkje kokar over.
I følgje oppskrifta som eg fann på godt.no, skal ein og piske krem og ha oppå saman med raspa sjokolade. Vi hadde drikken til kveldsmat saman med aniskringler, kjeks og ost og anna ymse pålegg. Eg trur nok kremen hadde vorte litt for mykje då.

Den heilt originale oppskrifta er litt meir eksklusiv enn denne:
Til ein person:
1 pl dronningsjokolade
1/2 dl vatn
1 dl heilmjølk
3 dl krem til topping
sjokoladestrø

Framgangsmåten er den same som eg skreiv ovanfor.
Viss du vil gi sjokoladen ein ekstra snert, kan du finhakke litt chili - mengden chili må stå i høve til kor mykje sjokolade du lagar - og koke saman med resten. Då blir det ein ekstra spiss smak som er særskilt god vinterstid!

Ein porsjon rykande varm sjokolade er absolutt noko å unne seg i påska!

Ha ei fortsatt fin høgtid :)

Oppdekt til triveleg kveldsmat for store og små!

Kake til påske :)

Treng du eit lite innspel på ei kake å bake til påskehelga? I helga har eg baka mi eiga påskekake: Mandelbotn med appelsinfromasj! Påska er verkeleg ikkje god utan appelsinfromasj!

Oppskrifta på mandelbotn er nokså enkel:
200 gram malte mandlar
4 egg
150-200 gram sukker
2 ss kveitemjøl
1 ts bakepulver

Mal mandlane fine med stavmiksar, food processor eller ei kvern. Eg brukte stavmiksar, og då vart det nokre små bitar med mandlar og - eg synes det er godt når det gir litt tyggemotstand.
Pisk eggedosis av egg og sukker, og rør forsiktig inn mandlane, mjølet og bakepulveret.
Eg hadde knapt med egg - berre fem stk, og sidan eg skulle lage fromasj og, piska eg alle saman, og delte røra slik omtrentleg i to. Eg kunne faktisk latt meir gått til fromasjen, for røra hever seg i omnen.
Kaka skal steikast i rund form, ca 22 cm, på nedste rad i ca 50 minutt.
La kaka avkjøle på rist før du breier over ho fromasjen. Det er viktig at kaka er inni forma når du skal leggje fromasjen oppå.

Appelsinfromasj:
6 plater gelatin
1/2 dl kokande vatn
3 egg
6 ss sukker
3 dl kremfløyte
1 appelsin

Legg gelatinen i blaut i kaldt vatn ei lita stund, før du smeltar dei i litt kokande vatn. Pisk eggedosis - viss du gjer det på same måten som eg gjorde, treng du ikkje ha på ekstra sukker, då held det med det som er oppgitt i kakeoppskrifta. Eg endte opp med å ikkje få eggedosisen stiv då eg skulle piske han opp att og lage fromasj, men det gjorde ingen ting. Eg hadde oppi gelatinen i fin stråle i eggedosisen, før eg raspa skalet av appelsinen og kresta ut safta av den og hadde oppi. Eg var redd for at det vart for mykje væske til å få fromasjen stiv, men det gikk "fole" godt! Avslutt med å piske kremfløyta stiv, og bland alt forsiktig saman.
Brei til slutt fromasjen over kaka, og sett det til kjøling ei stund.

Eg er kjempedårleg på å pynte kaker, og hadde ikkje så mykje aktuelt tilgjengeleg å pynte med. Det vart tre oppskorne kiwiar og ein oppskoren raudappelsin. Nokså fargerikt om eg skal seie det sjølv!
Kaka smakte heilt fortreffeleg, og eg gir helgas bakst terningkast 6 :)

Lukke til - og ha ei riktig god og smakfull påske :)

Kva skal vi med boksesporten?

Det heiter seg at ein ikkje kan bli profet på eigen heimstad. Fredag kveld vart den funksjonshemma idrettsutøvaren Nils Erik Ulset feira av si eiga heimbygd som ein helt.

 Idrettsutøvaren med 24 medaljar, berre fem færre enn Bjørn Dæhlie har, frå Paralympics og VM for funksjonshemma i skiskyting og langrenn, trenar 600 timar i året – det er ein knapp time mindre for dag enn dei topptrente, funksjonsfriske idrettsutøvarane gjer. Med sitt humør, høge moral og mentale styrke er han eit forbilde for svært mange.
Onsdag sist veka: Norges Bokseforbund vart suspendert frå det internasjonale bokseforbundet (AIBA), boksesporten i Noreg er i krise. Herreboksarane får ikkje bruke hjelm i nasjonale konkurransar. Straffa er at alle dei som ikkje har krav på seg til å bruke hjelm, det vil seie kvinneklassa og juniorar, også blir utestengt frå deltaking på den internasjonale boksearenaen.
Den norske «knockoutlova» som gjeld for boksing på norsk jord har regel rett slått boksesporten knock out inntil det kjem ei ny lov frå Høgre/FrP-regjeringa.

Då Cecilia Brækhus boksa VM-kamp for snart to månadar sidan i Københamn, var det mange statusar på facebook som hylla hennar idrettsprestasjon. Eg var ikkje blant dei. Det er sikkert stor grunn til å hylle hennar innsats som idrettskvinne, men boksing appellerer ikkje til meg. Brækhus boksar på internasjonale arenaer, og der er det fritt for hjelm. Forsking viser at boksing kan gi alvorlege skadar på hovudet, mellom anna er det auka sjanse for demens i alderdommen, men det internasjonale bokseforbundet (AIBA) bryr seg opplagt ikkje om slike «bagatellar».
Eg spør meg: Kva skal vi eigentleg med boksesporten? Treng vi han? Må vi ha ein idrett som går ut på å slå laus så hardt og brutalt som mogleg ? Kva tilfører eigentleg boksesporten idretts-Noreg? Mykje har vore sagt og skrive om dei som slår i Guds namn, men er det no meir heilagt å slå i idrettens namn?
Det er ikkje mange år sidan det var innført påbod om å bruke hjelm i internasjonal sykkelsport og i alpint. Mange idrettar har slike reglar som er eit sikkerheitstiltak for utøvarane i idrettar som har stadig større fokus på vinning av tidelar. I ein av verdas farlegaste innandørsidrettar skal det altså ikkje vere slike sikkerheitstiltak i følgje internasjonale reglar. Dei reglane seier AIBA skal og gjelde i Noreg.
Cecilia Brækhus tar inn rundt 2 millionar kroner i sponsorstøtte for sine bokseprestasjonar. Therese Johaug er blant dei best betalte kvinnene i langrennssporten, også ho med millioninntekt gjennom sponsoravtalar.

Då var det andre bollar då Brå brakk staven i ski-VM i Oslo i 1982! For norsk skiidrett var det eit lykketreff at det var akkurat Terje Bogen, sponsorgeneralen, som stod der då Oddvar Brå trengte ein ny stav. Det var den tida då vi endå kjente eit eigarskap til dei norske langrennsutøvarane, då alle fortsatt var nokså likestilte økonomisk.
Det er ikkje akkurat den kjensla eg får når eg ser skiløparen frå Trøndelag som får eit større tosifra millionbeløp for å gå med reklame for Kooperativen på drakta – Kooperativen som alltid har vore litt mitt og litt ditt. No sponsar dei Petter Northug jr med nokså mange millionar for at han skal vere privatpraktiserande skiløpar. Når att på til OL i Sotchi slo feil for skiløparen, er det vel stadig færre som kjenner på dette eigarskapet til den COOP-finansierte Northug jr. Det er fristande å kalle dette for den nye stormannsgalskapen.

Det var og noko heilt anna på Vågbø grendahus fredag kveld. Ein beskjeden kar med tre medaljar kom ruslande inn. Nils Erik Ulset, ein av tidenes beste norske idrettsutøvarar innanfor idrett for funksjonshemma, har onkelen si bedrift, Tingvoll Interiør, som hovudsponsor – dei bidrar med 15 000 kroner i året! I tillegg til det får han inn nokre kroner frå Olympiatoppen og skiskytterforbundet, men det er knappast nok til å halde karriera i vater. Med enormt pågangsmot til trass for funksjonshemminga og til trass for manglande inntekter i idretten, står han fram som ein liketil kar med sunne verdiar.
Det var der på grendahuset i den vesle grenda i Tingvoll eg kjente på eigarskapet til ein idrettsutøvar som fremmer idrett på ein sunn og ukommersiell måte. Nils Erik Ulset er ein god representant for den idrettsgreina han representerer. Med få midlar og med oppvekst i ein mikroprikk på verdskartet, har han gjennom idretten besøkt og konkurrert i store delar av verden. Som romsdaling busett på Nordmøre kjente eg at eg kunne eit augeblink dyrke Ulset som den idrettshelten han er – og kjenne at han faktisk er litt min og!