Totalt antall sidevisninger

Viser innlegg med etiketten baking. Vis alle innlegg
Viser innlegg med etiketten baking. Vis alle innlegg

lørdag 16. mai 2020

Heimlaga prim med heimbaka brød under!

Dagens viktige tips for å unngå kasting av mat: Ta vare på brunostrestane. Plutseleg har du ein delikat heimlaga prim å ta på skiva di :)


Du veit den følelsen når du kjem stressande heim frå arbeid, brøddeigen har venta på deg i nokre timar og på ei ganske kort stund har du og gått i gang med noko meir matlaging... Ungen er svolten på taco og mor har arbeid å gjere resten av kvelden... (det skulle jo trass alt vere finale i Idol!)
Det kan gå bra og det kan gå rett vest. Heldigvis gjekk dette veldig bra i går. I dag blir det matblogg frå Ingunns hand :)

Eg har samla brunost gjennom fleire år. I omtalar av heimlaga prim står det at osterestar må lagrast i boks med lokk i kjøleskåpen i staden for i plastpose for å unngå at dei blir mugla. Men eg tenker at det kjem an på kor lenge og kor mykje ein skal samle. Eg har samla og samla - ei god stund faktisk. Til slutt hadde eg ein kilo med brunostrestar i frysaren. Målretta samling gjennom lang tid :)
Men så er spørsmålet: Kva skal ein med desse restane? Og eigentleg er det ikkje så mange forslag, men det beste er uansett å koke det om til prim å ha på skiva. Eg fann ut at eg skulle prøve to forskjellige (mesta forskjellige) oppskrifter.
Det er to viktige forskjellar i desse oppskriftene: I den eine leggast brunosten i blaut i surmjølk før han kokast opp, mens den andre er brunost kokt opp i fløyte. Eg tenkte at med ein kilo brunost kan eg unne meg å teste ut.

Prim 1: surmjølkprim
Eg tok:
500 gram oppskoren brunost 
5 dl surmjølk (kan vere skumma surmjølk, så blir den ikkje så feit)
2 ts sukker

Hakk opp brunosten og legg i ei bolle. Slå over surmjølk, rør om og set på kjøkkenbenken i rundt 12 timar, så rekk han å begynne å løyse seg opp.
Slå blandinga i ein kaserolle. Kok opp og rør under koking slik at bitane smeltar i mjølka. Skru så ned varmen og la han småkoke i ein halvtime. Tilsett sukker før du tar kaserollen av plata og sett han i oppvaskkummen med kaldvatn. Rør i blandinga mens han avkjølast, slik at han ikkje klompar seg. Fordel i høvelege glas. Denne vart litt lysare i farga enn den neste typen.

Dette fiksa eg torsdag kveld før eg la meg.

Klar for koking i kaserolle.

Ferdig :)

Prim 2: fløyteprim
Eg tok: 
500 gram oppskoren brunost
1 boks fløyte (min har stått i frysaren, og det gjer ingen ting!)
1 raus ss maizenna
1 raus ss sukker
1 raus ts vaniljesukker

Bland alt i kaserollen, sett på plata og kok opp. Massen skal tjukne, og då er han klar til å bli tatt av plata og helt over i desse høvelege glassa. Eg trur denne metoden tok absolutt maks ein halvtime. Det er det verd, for smaken satt som eit skot med ein gong :)


Klart for koking.

Foran står kjelen med fløyteprimen og bak står surmjølkprimen.


TIPS: Eg kjøpte ei pakke med veldig høvelege glass på Europris til ein liten femtilapp. Dei er 2,5 dl store og ein kurant storleik. Ein veldig fin storleik om ein vil gi bort i gåve :)

Så var fløyteprimen ferdig.
Ingen ting er vel bedre enn ferskt brød med ferskt pålegg. I høve helga har eg og bakt ein liten haug brød - med lite gjær og langtidsheva over natta og litt til. Eg ser i ettertid at det hadde vore nok med 1 ts tørrgjær. Eg kan og legge til at eg skriv her den storleiken eg lagde deigen i, ikkje den opprinnelege oppskrifta.

Oppskrift til langtidsheva brød

480 gram havregryn
9,6 dl kaldt vann (til havregryn)
1,9 kg hvetemel (gjerne blanding grovt og fint mjøl) 
9 dl kaldt vann
1-2 ts tørrgjær
2 ts salt
1-2 ss linfrø
1-2 ss chiafrø

Legg havregryna i blaut i mixmasterbolla i kaldvatn, rør om og la det stå og godgjere seg i 20 minutt.
Bland oppi bolla resten av indgrediensane, men ta i vatnet litt og litt. Bruk miksmasteren til å kna deigen godt i eit kvarters tid (minst).
Ta deigen over i ei bolle med lokk. Her kan ein gjere to ting - avhengig av når du skal bake ut deigen: Anten: Sett på lokket og la deigen stå ute på benken i rundt 5-6 timar eller 10 - eller: Sett på lokket og sett deigen i kjøleskapet ein ti timars tid eller femten. Før du bakar han ut, lar du deigen stå i romtemperatur 60 minutt.
Ha mjøl utover benken og elt deigen forsiktig. Form brød - til meg vart det tre høveleg store og eit mindre - som du legg i brødformer. La brøda etterheve til dei har dobla storleiken, i omtrent 60-90 minutt.
Steik brøda på 180 grader i rundt 50 minutt - til du kan høyre hullyden i botn når du bankar i dei. La brøda avkjøle seg i ei god stund før du skjer i dei, for å få et saftigere brød.
I løpet av dagen er det nokre rundt i Sunndal som skal få gleda av å ta del i arbeidet mitt :) Eg gler meg til å gi bort til nokon som fortener ei hyggeleg oppmuntring til nasjonaldagen :) Hurra for 17. mai og det gode som bor i oss menneska! 

tirsdag 23. juni 2015

Ei kake er ikkje berre ei kake!

Sist laurdag var eg i bursdagsselskap, og det er lenge sidan sist gong eg la så mykje arbeid i ei kake som eg gjorde til nettopp det selskapet.

I mitt stille begynte eg å tenke tilbake til det som eg meiner var sist gong eg verkeleg la min kreative fantasi og kjærleik i ei kake. Det var til tante Fannys 50-årsdag. Det er mange år sidan no. Rundt åtte månader seinare døydde ho av kreft, og eg har tenkt i blant på den kaka etterpå. Ein måte for meg å vise kor utruleg glad eg var i ho.

Helgas jubilant betyr og mykje for meg, og då ho spurte om eg kunne bake kake til selskapet, var det sjølvsagt ikkje nei i min munn. Sidan det er straks St.Hans og eg hadde fått så mykje rabarbra med jubilanten, hadde eg lyst å lage ei fantastisk god rabarbrafestkake. Eg leita nokså lenge rundt på nettet for å finne oppskrifter som kunne funke, og kaka blei ei blanding av to forskjellige oppskrifter.

Ingunns rabarbrafestkake :)

Kaka består av ein mandelbotn med ein rabarbramousse oppå. Oppskrifta eg gjengir her er litt mindre enn det eg laga, for det blei noko for mykje med mousse. Viss ein vil ha ei skål til dessert, gjer sjølvsagt ikkje det noko.


Mandelbotn:

200 gram mandler som males anten i ei kvern eller i blender
4 eggekviter som stivpiskast
ca 200 gram sukker røyrast inn mot slutten
Bland mandlane forsiktig inn i marengsen, og steik det i ei vanleg rund form. NB! Hugs bakepapir i botn. Steikast ved ca 175 grader i rundt 25 minutt midt i omnen. La kaka avkjøle.

Rabarbramousse:

Lag først ein rabarbrakompott. Eg gjorde det på følgande måte etter oppskrift eg fann på Kvinner og klær si nettside:
La steikeomnen bli ståande på 175 grader. Medan kaka steiker, gjer du klar rabarbraen.

Ca 5-600 gram rabarbra reinsast og skrellast, før den blir skore i bitar. Legg det i ei ildfast form med bakepapir oppi.

1 - 2 ss potetmel 
ca 280 gram rørsukker (den er litt brunare enn vanleg sukker, men ikkje så brunt som brunsukker)
Frø av ei vaniljestang skrapast ut og leggast oppå rabarbraen. Legg vaniljestanga oppi forma.
strøast over rabarbraen. 

Sett dette inn på midten i steikomnen, og la det stå i nærmare halvtimen og godgjere seg. Ta forma ut av steikomnen, og la det avkjøle seg. Når denne kompotten er kald, moser du den til mos. Mest eigna er å bruk blender til dette.


Så kan du lage moussen:

4 eggeplommer 
1 dl sukker
1/2 dl vatn som skal kokast
5-6 gelatinplater 
3 dl fløyte

Legg gelatinen i blaut i kaldt vatn. Pisk eggedosis av eggeplommar og sukker. Kok opp vatnet og smelt gelatinen i det. La det avkjøle. Pisk kremen stiv. Bland saman eggedosisen og kremen. Ha oppi rabarbrakompotten, og ha til slutt i den smelta gelatinen. 



Klar til å blande krem, eggedosis, kompott og gelatin.

Ha forma rundt mandelbotnen som ligg på eit fat. Ta over moussen og sett det i kjøleskapet. Den bør bli godt stiv i løpet av nokon timar. Eg hadde i for lite gelatin, så min vart ikkje heilt stiv nok, men smaken var det ingen ting å utsette på. Pynt til slutt med til dømes oppskorne jordbær, blåbær, druer. Utruleg frisk og god kake :=) Eg vart skikkeleg godt fornøgd sjølv og, for å seie det som det var.



Det endelege resultatet! Kakepynting har aldri vore mi sterke side ;)



søndag 13. april 2014

Kake til påske :)

Treng du eit lite innspel på ei kake å bake til påskehelga? I helga har eg baka mi eiga påskekake: Mandelbotn med appelsinfromasj! Påska er verkeleg ikkje god utan appelsinfromasj!



Oppskrifta på mandelbotn er nokså enkel:
200 gram malte mandlar
4 egg
150-200 gram sukker
2 ss kveitemjøl
1 ts bakepulver

Mal mandlane fine med stavmiksar, food processor eller ei kvern. Eg brukte stavmiksar, og då vart det nokre små bitar med mandlar og - eg synes det er godt når det gir litt tyggemotstand.
Pisk eggedosis av egg og sukker, og rør forsiktig inn mandlane, mjølet og bakepulveret.
Eg hadde knapt med egg - berre fem stk, og sidan eg skulle lage fromasj og, piska eg alle saman, og delte røra slik omtrentleg i to. Eg kunne faktisk latt meir gått til fromasjen, for røra hever seg i omnen.
Kaka skal steikast i rund form, ca 22 cm, på nedste rad i ca 50 minutt.
La kaka avkjøle på rist før du breier over ho fromasjen. Det er viktig at kaka er inni forma når du skal leggje fromasjen oppå.

Appelsinfromasj:
6 plater gelatin
1/2 dl kokande vatn
3 egg
6 ss sukker
3 dl kremfløyte
1 appelsin

Legg gelatinen i blaut i kaldt vatn ei lita stund, før du smeltar dei i litt kokande vatn. Pisk eggedosis - viss du gjer det på same måten som eg gjorde, treng du ikkje ha på ekstra sukker, då held det med det som er oppgitt i kakeoppskrifta. Eg endte opp med å ikkje få eggedosisen stiv då eg skulle piske han opp att og lage fromasj, men det gjorde ingen ting. Eg hadde oppi gelatinen i fin stråle i eggedosisen, før eg raspa skalet av appelsinen og kresta ut safta av den og hadde oppi. Eg var redd for at det vart for mykje væske til å få fromasjen stiv, men det gikk "fole" godt! Avslutt med å piske kremfløyta stiv, og bland alt forsiktig saman.
Brei til slutt fromasjen over kaka, og sett det til kjøling ei stund.

Eg er kjempedårleg på å pynte kaker, og hadde ikkje så mykje aktuelt tilgjengeleg å pynte med. Det vart tre oppskorne kiwiar og ein oppskoren raudappelsin. Nokså fargerikt om eg skal seie det sjølv!
Kaka smakte heilt fortreffeleg, og eg gir helgas bakst terningkast 6 :)

Lukke til - og ha ei riktig god og smakfull påske :)


mandag 31. mars 2014

Havrebrød

Sist laurdag hadde Liv Inger Mæle ei oppskrift på brød med havregryn i spalta si i Aura Avis. Dei har eg bakt i dag :)




Oppskrifta er som følgjer:

1 l skumma melk
1 pk gjær
3 ss soyaolje (rapsolje funkar like bra)
3 ss (mørk) sirup
1 ts salt
400 g (store) havregryn
400 g fin eller grov sammalt kveite
(avhengig av kor grovt du vil ha brødet)
400 g kveitemjøl
havregryn oppå

Varm opp mjølka til fingervarm temperatur. Viss du brukar fersk gjær, blandar du den med mjølka. Viss du brukar tørrgjær, blandar du det i mjølet. Ha i olje, sirup, salt og havregryn i kasserollen, og la havregryna bli litt mjukare.
Ha alt samla i ei bakebolle og rør godt saman deigen. Viss ein brukar maskin, skal 4 minutt på halv styrke vere passe. Dekk deigen til og hev han i minimum 45 minutt.
Del deigen i to stykkar og bak ut brøda og ha i kvar si form. Hev dei i minimum ein halvtime. Pensle med vatn, mjølk eller anna (eg brukte nøytral yoghurt), og strø med havregryn på toppen  før dei blir steika nedst i omnen på 190-200 grader i ca 45-50 minutt. Husk bakepapir i forma.
Liv Inger Mæle skriv at det er ein hovudregel at ein ventar til neste dag når brøda er heilt avkjølt med å skjære i dei... det gjekk bra om dei berre hatt stått i ein times tid og avkjølt seg og, men blir heilt sikkert saftigare om ein ventar til neste dag.

Lykke til :)

tirsdag 4. mars 2014

AHHH... Det kitlar...

...i nasen... Det er feitetysdag og den internasjonale pannekakedagen! Og eg kjenner meg lukkeleg :)


Halvgrove pannekaker, bacon, tomatsuppe og heimlaga saft! Det var feitetysdagen sin det!

Fordi det har dufta i huset av heimlaga mat i heile ettermiddag og kveld! Det er faktisk veldig få ting som slår det å kjenne lukta av heimlaga mat i huset! Særleg gjærbakst! Og eg skal på venninnetrimtur i morgon og ha piknik ute i det fri!!! Er det rart eg er lukkeleg ?!

Kva gjorde vi så med feitetysdag og pannekakedagen? Jau, svaret er ganske så enkelt! Vi laga pannekaker - halvgrove - og hadde steikt bacon til! Og i dag valte eg heimlaga tomatsuppe til! Eg er veldig lite begeistra for posesuppe! Men mamma si heimlaga tomatsuppe derimot er noko heilt anna! Og det tar ikkje noko meir tid enn å koke posesuppe! Men smakar altså veldig mykje betre!
Oppskrifta på suppa er omtrentleg slik:

7-8 dl vatn kokast opp
2-3 ss mjøl i litt vatn rørast inn
2 ss tomatpure blandast i saman med
2 grønsakbuljongterningar
Kokast ei lita stund på svak varme
Bland i litt mjølk eller fløyte til slutt saman med ein neve kokt makaroni

I tillegg gjorde eg følgjande for å spisse suppa:
ca 1/4 chili småhakka
1/2 charlottlauk småhakka
1 fedd kvitlauk småhakka
- vart hatt oppi suppa samstundes med makaronien.

Og eg syntes det smakte rimeleg bra - kanskje litt sterkt - medan Ingvild syntes det vart drygt hot!

Sidan eg altså skal på piknik i høgda i morgon, har eg bakt noko eg ikkje har bakt på over eitt år, nemleg det eg kalla for mat i svingen (http://ladyingunn.blogspot.no/2013/01/mat-i-svingane.html). No gler eg meg veldig til turen, praten, baksten og sjokoladen vi skal ete!

Så slik gjekk altså min feitetysdag :)

Mat i svingane - nybaka - klar til piknik ute i det fri i morgon!

torsdag 6. februar 2014

Og så gjer eg som haren...

...nemleg å hoppe vidare...! Og no: Over til bakekroken!

For nokre dagar sidan bakte eg brød som vart så god at eg er mesta misunneleg på meg sjølv.
Det starta med at eg fekk ei bok med oppskrifter med speltmjøl til bursdagen min - Bak med spelt av Mone Eli Sæland.
Eg har ikkje hatt speltmjøl ståande heime dei siste månadane, så boka har ikkje vore i bruk. Men for nokre veker sidan kjøpte eg inn litt ymse utval av sorten, så det begynte å nærme seg tida for å få det brukt.
Eg bladde meg fram til ei oppskrift som eg syntes vekte mi interesse, nemleg valnøttbrød.
Eg valte å sløyfe valnøttene, men prøvde å følgje oppskrifta slik høveleg elles. Her er oppskrifta med mine endringar i tillegg:

Til 2 brød:
2 dl vatn
2 dl appelsinjuice
2 dl biola eller yoghurt naturell
3 ss rapsolje eller smør
1 pk fersk eller tørr gjær
2 ts salt
2 ss (lønne)sirup
2 ts revet muskat
1 ts malt ingefær
2 dl sikta rug
2 dl speltflak
6 dl sammalt spelt
4 ss fiberhusk
8-9 dl sikta spelt
4-5 stk mosa kokt potet
1-2 dl raspa gulrot

Eg varma opp vatn, juice og yoghurt til nærare 40 grader. Så blanda eg det saman med alt det tørre i ein miksmaster og blanda saman. Potet og gulrot hadde eg oppi til slutt.
Fiberhusk er eit bindemiddel. Før trudde eg at ein berre brukte det når ein baka lavkarbobrød for å få det til å hengje saman, men no ser eg at det passar godt å ha oppi vanlig brøddeig og. I tillegg står det på pakka at det gjer baksten saftigare. Om det var fiberhusken eller samansetninga av alt i brødet som gjorde det saftig, skal vere usagt, men saftigare brød enn det her, har iallfall eg aldri bakt før!
Eg lot det stå og heve ei stund, før eg baka ut to brød. Alminnelig steiketid: Ca 200 grader i rundt 45 minutt på nedste rille!
Eg har iallfall aldri bakt betre brød! Lykke til :)



torsdag 29. august 2013

Har kokkelert litt denne veka :)

No fekk eg lyst å dele litt av det eg har sysla med på kjøkenet denne veka! 

For nokre dagar sidan bakte eg polarbrød etter oppskrift frå Trines Matblogg. Eg må prøve å bake dei fleire gonger før eg legg ut oppskrifta, men ho ligg lett tilgjengeleg i matbloggen hennar.
I tillegg bakte eg ein ny runde med knekkebrød. Oppskrifta fann eg på baksida av havregrynpakka frå Coop eg kjøpte, og eg brukte ho til punkt og prikke med eitt unntak - i staden for havregryn brukte eg tilsvarande mengde med frokostblanding med mellom anna tørka rosiner og bananar. Det tok eg og knuste litt i ein blender, slik at det vart mindre bitar. Det vart skikkeleg gode knekkebrød :)



Her er oppskrifta originalt:
4 dl grov sammal rug
4 dl store havregryn
2 dl solsikkekjerner
1 dl sesamfrø
1 dl linfrø
1 ts salt
7 dl vatn

Eg rørte alt saman til ein tjukk deig. Så tok eg på bakepapir på tre steikebrett, og smurte røra så tynt som mogleg utover på bretta. Eg sette alle tre bretta inni varmluftsomnen og steikte dei på 160 grader i ca 15-20 minutt. Då tok eg dei ut og ruta opp i høveleg storleik - 16-20 firkantar på kvart brett. Temperaturen vart senka til 150 grader, og steikt vidare i 45-50 minutt. Det er lurt å bytte på kor bretta står i omnen, slik at det blir jamn fordeling av varmen. Hugs å lufte ut damp frå omnen undervegs fleire gonger. Avkjølast på rist!

I går lagde eg for første gong i mitt liv blomkålsuppe. Eg er ikkje så veldig tradisjonell av meg, så eg brukte oppskrifta eg fann på Trines Matblogg, og den inneheld både purre og bacon.



Her er oppskrifta:
1 stort blomkålhovud i bitar
1 liten lauk finhakka
8 dl kyllingkraft (kyllingbuljong eller utblanda kyllingfond)
2 dl mjølk
2 ss creme fraiche eller rømme
1/2 purre strimla
150 gram nysteikt bacon
Salt og peppar
Frisk persille
Brød til
Først kokte eg opp kraft og mjølk, før eg hadde oppi blomkålhovudet saman med lauken, og let det koke mørt, ca 15 minutt. Køyr suppa jamnt med ein stavmiksar, og tilsett litt creme fraiche/ rømme før servering.Gi suppa eit oppkok, og tilsett salt og pepper. Like før servering har ein oppi nysteikt bacon saman med purren. Baconet kan erstattast av sprøsteika spekepølse eller chorizo.

I dag hadde vi omnsbakt torsk til middag, også dette med oppskrift frå Trines Matblogg.
Eg brukte eit stykke torskeloins til kvar av oss. Desse vart først salta og skylt, før eg hadde på meir salt og nykverna pepper. Eg hadde det i ei eldfast form og steikte det i ca 15 minutt i steikeomnen på midterste rille. Så tok eg aluminumsfolie over forma og lot ho stå til maten skulle serverast.
Ved sidan av torsken serverte eg ein blomkålpurè.


Oppskrifta er slik:

1 blomkålhovud oppskjært i bitar
1 potet i bitar
1-2 fedd kvitlauk, heil eller grovhakka
1-2 ss smør
salt og peppar

Kok grønsakene saman til det er mørt, og slå av vatnet. La det dampe tørt i kaserollen nokre minutt. Bruk ein stavmiksar og mos alt saman, og ha oppi smør og salt og peppar til slutt.
Serverast saman med fisken. Eg hadde på sprøstekt bacon i tillegg!
Verkeleg godt vart det!!!

Dette var kort om litt av det eg har sysla med her i heimen denne veka!

tirsdag 7. mai 2013

Eg bakar, ergo er eg!

Sidan eg ventar besøk før pinse, er eg fullt i gong med vasking og baking, og tida er knapp, for eg blir mykje vekk!
Kven som kjem på besøk, skal eg fortelje betre om nokre dagar!

I dag har eg baka brød (ja, eg begynte i 21-tida i kveld, og no er klokka 1, og eg er snart ferdig...)! Eg synes det er artig å prøve oppskrifter, og vere mest mogleg nøyaktig i å lage dei! Sjølvsagt skjær det seg ofte... I dag var eg mesta heilt fri for havregryn.... og då vart gode råd dyre, og eg tok ei blanding av kveitekli og kveitekim! Og når eg tenkjer meg om, mangla eg vel halvparten av yoghurten og, så då spedde eg ut med ein surmjølksrest eg hadde.

Brøda heiter matpakkebrød, og oppskrifta var slik (etter oppskrift av Wenche Andersen i eit Hjemmet-bilag):

5 dl vatn
5 dl yoghurt naturell
1/2 dl rapsolje
1 pk gjær (fersk eller tørr)
2 ts salt
1-2 ss sukker eller honning
1 dl solsikkekjerner
200 gram havregryn
300 gram spelt, sammal grov/ fin
8-900 gram sikta spelt, evt. kveitemjøl
egg eller mjølk til pensling
sesam, valmuefrø eller solsikkekjerner til dryss

Eg varma vatnet og mjølka/ yoghurten saman med olja, og så blanda eg alt mjølet. Eg hadde berre 300 gram speltmjøl, så dermed vart resten ei blanding av kveitemjøl og kveite fullkorn, for å få det grovare.
Ha nedi bolla salt, sukker/ honning (eg gløymte det), solsikkekjerner og havregryn saman med alt mjølet, og bland i væska som ikkje må vere for varm.
Bland alt godt saman, og sett så deigen til heving! Etter rundt tre kvarter tek du deigen og knar han til og bakar ut to solide brød. Dei lyt etterhevast i nye tre kvarter! Steikast i 30-40 minutt ved 200 grader!

Matpakkebrød og skolekaker!
Så fann eg ei bakebok i hylla som eg mesta ikkje har opna... Hjemmebakst med helkorn er tittelen! snart tjue år gammal - og som sagt: mesta uopna!
Der kom eg over ei oppskrift på noko som var kalla skolekake. Oppskrifta er slik:

650 gram kveitemjøl (eg brukte mest kveite fullkorn)
3,5 dl mjølk (pass på så det blir nok!)
50 gram smør
50 gram honning
1 pk gjær
100 gram rosiner
100 gram hakka nøtter
litt salt
1 egg

Smelt margarinet og ha mjølka oppi saman med honningen, og gjerne egget samtidig. Bland mjøl, gjær, rosiner og nøtter i ei bakebolle, og slå mjølka over. Bland saman til ein god deig, set den på heving i eit kvarters tid, før du bakar deigen ut til eit høveleg tal bollar. Etterhevast i eit kvarters tid. Pensle med vatn, står det i boka, men eg hadde ein rest med fløyte, så den trur eg høvde heilt utmerka!
Steikast høgt i omnen ved 220 grader i eit kvarters tid.


Då håpar eg maten vil smake, vel be komme! :)

mandag 8. april 2013

Den "besværlige" bakedagen!

I går tenkte eg at eg skulle bake litt! Det er vel sjeldan det går så skeis med bakinga som eg synes det gjorde då!

Eg starta med å lage speltknekkebrød etter denne oppskrifta frå Trines Matblogg:

4 dl sammalt spelt, grovt
3,5 dl havregryn
2 dl solsikkekjerner
1 dl linfrø
1 dl sesamfrø
1,5 dl nøtter (eg brukte omlag halvparten graskarkjerner og halvparten valnøtter)
10 g salt
6 dl vatn
1-2 ts honning
sesamfrø oppå knekkebrød

Eg blanda alle dei tørre tinga saman, før eg blanda det med vatn og honning. Etter å ha rørt det godt saman, lot eg ho stå og godgjere seg ein liten halvtime på benken. Så tok eg det utover fordelt på tre knekkebrød.
Det var steikt i omnen på 160 grader i omlag ein times tid. Det skjedde på denne måten: Eg sette først inn alle tre platene, og etter ti minutt tok eg det ut og streka opp firkantar med ein pizzakniv. Så sette eg det vidare å steike - 20 minutt på kvar høgde, før ein byttar om, slik at alle bretta er innom kvar høgde.
Eg heldt på å brenne knekkebrøda mine, men det gjekk bra, og dei vart veldig gode! Knekkebrøda skal vere tørre når du tek dei ut av steikeomnen etter totalt 70 minutters steiking.




Det neste eg ville prøve å bake, var valnøttrundstykker frå Brød og Korn si nettside. Opprinneleg såg oppskrifta slik ut:

3,5 dl vatn
400 g sikta speltmjøl
50 g sammalt rug, grov
50 g byggmjøl
100 g hakka valnøtter
10 g havsalt
1 pk gjær

Eg tenkte eg skulle fordoble oppskrifta, og tok 50-50 med sikta speltmjøl og grovt sammalt speltmjøl. Eg blanda saman alt det tørre, og så blanda eg i vatnet. I oppskrifta står det at ein skal ha oppi alle indgrediensane i ei kjøkkenmaskin, men halde att ein halv desiliter som ein tek i når deigen har blanda seg. Køyr først i 4 minutt på låg fart, før ein aukar farta og fortsett i rundt 7 minutt til. Ha oppi siste rest av vatnet, før deigen blir sett til heving ein times tid.
Deigen skal bakast ut til ti rundstykker som settast til heving ei stund til, før dei steikast i 10-15 minutt på 220 grader.

Her gjekk det noko gale til meg på ein eller annan plass i den kjemiske prosessen... deigen min heva ikkje som den skulle, og den var uråd å bake ut som rundstykker. Enden på visa var at eg delte deigen i to, og kjevla ut leivane til to stk brytebrød. Konklusjonen etter smaking, er at det smakte godt, men konsistensen blei noko tung! Neste gong blander eg nok ikkje inn so mykje grovmjøl! Men eg må definitivt prøve det att!



Det siste eg bakte, var mine eigne brød . fritt etter "ein tar kva ein har-prinsippet"! Kva hadde eg eigentleg oppi? Jau, havregryn, kli, kveitemjøl, kveite heilkorn, kveite fullkorn, sammalt grov rug, sikta rugmjøl, solsikkekjerner, hakka graskarkjerner, sesamfrø, linfrø, salt, solsikkeolje, sirup og gjær blanda saman med vatn.
Deigen heva bra, og det gjorde og dei utbaka brøda. Dei steikte og fint.... men så gløymde eg at eg hadde brød i omnen... Og kom på det eit kvarter etter at dei skulle vore tatt ut!!! Dei blei sjølvsagt nokså harde i skorpa... Minst like irriterande var det at eg fant ut etter å ha kappa dei i to at brøda ikkje var elta nok, og mest sannsynleg vil meir eller mindre gå i oppløysing når eg begynner å skjære i det...



Det var altså dagens bakeseanse... Det kan ikkje bli like vellukka kvar gong...!

Når ein berre får på pålegg, blir det godt til slutt!


fredag 29. mars 2013

Berre for å meddele noko....

Ja, er det ikkje likt seg - det er ikkje kvar dag ein har so all verda å meddele... Eg trur mesta lufta gjekk litt ut av meg etter det kjensleladda innlegget forrige laurdag! Eg fekk mykje positive tilbakemeldingar, og er det innlegget som har hatt desidert flest lesarar! Tusen takk for responsen!!!

Vi har hatt ei fredeleg påske saman med familie og svigerfamilie - ungane er kjempenøgde med å ha møtt alle søskenborna sine og besteforeldra sine, og eg er iallfall nøgd med veret.
Det øverste biletet her var eigentleg ein skivebom, men den vart jo litt artig lell! Eg skulle tak bilete av ei tantejente som leika med han Prins, men ingen av dei havna i linsa... Men skuggane viser at det var godt med sol iallfall!

For å seie som bjørnen i det blå huset: Hvor er - hvor er - hvor er Skygge?
Hvor er Skygge nå?

Aleksander leikar seg i eit tre ved huset til bestemor.

Utsikta mot Storfjorden og Stranda sett frå svigermor sin veranda.


Palmesundag bakte eg for første gong brød av speltmjøl.                                                                                                       Dei vart skikkeleg gode, og oppskrift kjem når eg kjem meg heim frå påskeferien!

torsdag 7. mars 2013

Det er vår i bygda!!!

Klokka er fortsatt tidleg på dagen, men så langt er eg nøgd med alt eg har sett og gjort !
Allereie før Aleksander og eg gjekk til barnehagen, "klaska" eg i hop røre eller deig til knekkebrød (usikker på kva eg skal kalle den konsistensen). Men snakker om lett måte å lage knekkebrød på! Dette er så enkelt at det kan til og med far gjere!!!

Oppskrifta fann eg på bloggen Notisboka:
4 dl havregryn
4 dl sammalt grovt rugmjøl
2 dl solsikkekjerner
1 dl linfrø
1 dl sesamfrø
Litt salt
Litt honning (eg brukte akasiehonning)
7 dl vatn

Alt dette blanda eg i hop og sette til sides til å svelle før vi gjekk i barnehagen. Eigentleg er halvtimen nok, men med min sulling og stulling med andre ting, stod den enda lengre. Så smurte eg tynne lag utover på tre stk bakepapir og la det på steikeplater. Tidlegare har eg steikt tre plater i omnen på ein gong, og det går heilt fint, men i dag tok eg det i to omgangar. Den skal steikast på 150 grader. Sett inn to eller tre plater på ein gong. Etter 10 minutt tek du det ut og skjær opp knekkebrødet i høvelege storleikar med eit pizzahjul, og set det inni igjen. Pass på at du ikkje sett inn brettet på same høgda som du tok det ut frå! Steiketida er 30-40 minutt, og pass på at du minst ein gong undervegs flyttar om på bretta inni omnen, slik at dei blir jamnt steikte.

Nysteikt knekkebrød med brunost på!


Tilbake til turen til barnehagen:
På veg heim, bestemte Prins og eg oss at vi måtte ned til Grøelva, for isen har begynt å smelte, og etter kvart kjem det friskt vatn rett frå fjellet ned! Eit veldig godt vårteikn! Og eg er så glad i å sjå på elver, og gler meg på at Skorga snart skal renne att!

Slik såg Skorga ut i går:



Og slik såg det ut ved Grøelva tidlegare i dag:

Grøelva med Stoplan i bakgrunnen.



Grøelva nedover mot Sunndalen.



Det er så livgivande å sjå elva som kjempar seg tilbake til livet på denne måten!


Så gjekk vi vidare, Prins og eg, og kom til Torske bru over Driva. Der såg det slik ut:

Driva sett nedover mot Sunndalsøra.


Driva sett oppover mot Oppdal.


Medan eg styra og skulle ta desse bileta, hadde eg lagt hanskane under arma. Så kom det eit par bilar køyrande, og eg måtte hoppe til sides, og samstundes passe på at Prins ikkje var påkøyrd. Etter å ha knipsa litt til, kom det jammen det eit helikopter siglande over bygda! Helikopter på nært hald er jo trass alt ikkje kvardagskost (heldigvis!) - for som oftast betyr det at det er nokon som er sjuk og må komme seg kjapt avgarde til sjukehus!
I dag var det heldigvis frakt av eit eller anna opp til Grødalen som var ærendet!





Etter å ha styra og knipsa helikopteret og, oppdaga eg til mi forferding at hanskane var borte... Bilane som for forbi, hadde garantert ikkje stukke av med dei, Prins hadde ikkje tatt dei, dei låg ikkje på brua... så då vart konklusjonen min at det var elva som tok dei... men eg såg dei ikkje nedover elvestryket då... Ja, ja - men ein hyggelig fotoshoot hadde eg iallfall!

Vel heime att!
Der såg eg at ei som eg er ven med på Facebook hadde linka til ein bloggartikkel som handla om smoothie! Og det passa bra, for plana mi var å lage smoothie! Eg hadde noko frukt som trengte å bli brukt! Eit av tipsa var å legge banan som var på tur å bli brun ferdigskrella i frysaren, slik at ein kunne bruke den frossen i smoothie. Så det gjorde eg! Dessuten hadde eg ein halv ananas som var på tur å bli øydelagt.
Indgrediensar i smoothien min blei følgjande:
Ein halv fersk ananas
Ein kiwi
Ein del druer
Ein halv nesten frossen banan
Ein halv pose frossen skogsbær
Ein god dæsj (1-2 dl) ananasjuice
Ein liten boks jordbæryoughurt
Så dura eg dette saman i blenderen! Så forfriskande vart det i vårsola i det rette glaset:

Vårsolsmoothie!!!!

Og det tenker eg eigentleg er eit greitt bilde å avslutte denne bloggstunda med! Håper andre og vart freista til å lage noko god heimlaga mat av dette!!!

onsdag 27. februar 2013

Korleis få eit kjedeleg pølsemåltid til å bli eit gilde!

I blant så kjennes det som at eg berre går og "spenner skank", som ein gammal kjenning av meg sa ein gong. I blant så dukkar kjensla av "another day off" fram. Eg trur kanskje det er mange som av ymse grunnar blir verande heime, og som ikkje kan eller har ein jobb å dra til, som kjenner det slik. Livet mitt er slik no at det vil bli fleire slike "another days off" - eg kan like det eller ikkje like det, men slik er det!
I dag var det heldigvis og definitivt ikkje ein slik "another day off"-dag! Eg har hatt veldig mykje å styre med, fordi vi skulle få besøk av søster mi og dei tre ungane hennar! Veldig kjekt sidan vi berre sjåast slik dann og vann! Ikkje så rart når dei bur i Valdres og vi bur her!
Sidan eg likar å lage ting skikkeleg for tida, og ungane sin livrett handlar om pølser og lomper - ikkje så mykje pølsebrød - fekk det vere dagens meny! Eller for å seie det heilt presist: På dagens agenda stod det at eg skulle bake pølsebrød, hamburgerbrød og lomper + lage hamburgerar og vaske! Etter å ha brakt junior til barnehagen på hans "Rolls Royce" - akebrettet! Siste dag i dag med akebrettfrakt dessverre! I morgon er det gode føret borte - det vil seie at det blir tryggare å komme seg ut heilskinna på to føter!

Oppskrift på pølsebrød og hamburgerbrød funnen på Trines Matblogg:


  • 1,5 dl vann
  • 1,5 dl melk
  • 1 ts honning
  • 2-3 ss olivenolje
  • 25 gram fersk gjær (eller 1/2 pakke tørrgjær)
  • 150 gram sammalt hvete, fin
  • 300 gram hvetemel (feks Vinjett av vårhvete)
  • ca 1/2 ts (hav)salt
  • 1 egg, til pensling
  • sesamfrø
Eg blanda saman alle indgrediensane - mjølka og vatnet varma eg opp til fingertemperatur. Så fekk deigen heve seg ei god stund, før eg baka han ut til pølsebrød og hamburgerbrød. No heva ikkje min deig seg så mykje som han skulle først, så for å vere sikker på at kvar leiv skulle bli stor nok ferdigutbaka, laga eg dei litt stor i utgangspunktet. 


Dei vart mesta litt i største laget, iallfall pølsebrøda. Eg burde ha laga eit par stykker til, så vart dei andre litt mindre! Men skitt au!
Dei vart steika ved 225 grader midt i omnen i omlag eit kvarter.

Lomper - oppskrift funnen på brodogkorn.no (Opplysningskontoret for brød og korn sine sider):

1 kg potet
1 ts salt
1 1/2 dl kveitemjøl
1 dl sikta rugmjøl

Her fulgte eg oppskrift slavisk frå begynninga av: Eg kokte opp potetene med skalet på. Så tok eg skalet av, og potetene skulle mosast saman med saltet.
Her er eg noko usikker på kva som er den likaste måten å mose på - eg prøvde i blender først, og då vart den poteta som knivane rakk tak i mosa omlag til mos. Så eg bytta til miksmaster, og hadde inn mjølet. Skal ein gjere det på den måten, er det viktig at ein har skore poteta i små bitar før ein har det i bolla. Imidlertid viste det seg at poteta rett og slett sugde mjølet til seg, og at det var behov for langt meir mjøl enn det står i oppskrifta.
Eg kan jo attpå til fortelje om ei tabbe eg gjorde og: Eg skulle vere dyktig husmor, så eg baka ut alle leivane - det vart i rundt 20 leivar - og la dei i ein svær haug. Så for eg på trimturen for å hente junior i barnehagen. Sidan poteta fortsette å trekke mjølet til seg, vart heile hopen med dei utbaka leivane klissate og hengde seg saman. Enden på visa vart at eg måtte bake alle ut på nytt før eg steikte dei på rimeleg sterk varme på takka mi. Og eg kan stadfeste at det er potet i lompene! Ikkje noko juks!



Slik såg det ut då eg steikte lompene på takka!


Så steikte eg hamburgerar. Denne oppskrifta er ei samanhoping av oppskrifter frå Trines Matblogg:

1 pk kjøtdeig, 400 gram
1 egg
Eit par spiseskeier ketsjup 
Eit par sjalottlaukar finskoren
Salt og pepper

Bland alt saman, og steik det på litt høg varme. Pass på at dei blir mest muleg gjennomsteikt etter at dei er steika på begge sidene. Og voilà: Hamburgerar klare til å legge inn i midten saman med salat i dei nysteika hamburgerbrøda!


Slik såg det ut då Ingunns heimesnekra hamburger var klar til servering! Til og med den fleire dagar gamle salaten greier å lyge på seg litt freshere farge enn det som sant var :)



Pølse og brød klar til å etast!



Og pølse med lompe :)


Rett så hyggeleg stemning rundt matbordet og Ingunns meir eller mindre heimsnekra pølsegilde !






lørdag 23. februar 2013

Heimsnekra taco og alkoholfritt øl!

I dag brukte eg mesta to timer på å gjere klar tacomåltidet - og det var verd det! Og i dag var måltidet heimsnekra tvers gjennom! Det å lage heile måltidet sjølv, gir for det først ein god kjensle av å utøve kokkeyrket på heimebane! Dernest er det så utruleg mykje sunnare og betre og ete noko ein veit kva er - mesta heilt utan e-stoff og søtningsmiddel!


Fredagsstemning i stua med rundt 30 tente ljos!

Eg laga guacamole etter denne oppskrifta:


1 avokado

Litt opphakka chili
Litt opphakka purre
Nokre dråpar sitronsaft
Litt salt og peppar

Del avokadoen i to, og ta ut steinane. Bruk ein gaffel og mos avokadokjøtet. Bland i chilien og purren, og smak til med sitronsaft, salt og peppar til ein god smak. Server!


Salsa:


1 boks hakka tomatar

1 liten lauk, t.d. ein charlottlauk
Litt opphakka chili
1 fedd kvitlauk som raspast fint
Ca 1 ss olivenolje
1 ts spisskummen
Litt salt og pepper

Hakk opp i små bitar lauken og chilien, og rasp kvitlauken på eit rivjarn. Surr dette i ei steikepanne saman med olivenolje, og bland i tomatane. La det stå og småputre i 20-30 minutt. Smak til med krydderet. Server!

(NB! Det er viktig å lese oppskrifta nøye og så gjere slik det står i oppskrifta... Det gjorde ikkje eg, så min salsa var ikkje koka, slik det står i oppskrifta. Muleg det var difor eg synes salsaen smaka noko beskt. Eg tek difor og kokar han i 20-30 minutt no, så ser eg korleis den er på smak då :) )


Heimlaga salsa (dog ukoka...) og heimlaga guacamole!


Heimlaga tacokrydder:


4 ts spisskummen

1 ts malt koriander
2 ts paprikapulver
1 ts hvitløkspulver
1-2 ts chilipulver
2 ts salt
1/2 ts pepper
1/2 ts tørket koriander
1/2 ts tørket oregano
1/2 - 1 ts chiliflak
1/2 ts cayennepepper

Bland alle indgrediensane saman. Til ein porsjon steikt kjøtdeig på 4-600 gram treng du omlag ei spiseskei med kryddermix. Det kan vere lurt å koke dette saman med omlag 1 dl vatn. Smakar heilt fenomenalt!!!

TIPS! Lurt å to-tredoble samanblandinga i eit glas og ha ståande. Ein kan og ha blandinga i eit glas og gi vekk i gåve til andre tacoelskarar!


Eit glas med heimlaga tacokrydderblanding - heilt fritt for kunstige tilsetningsstoff og søtningsmiddel!


Heimbaka tortillalefse:


Eg har prøvd fleire ulike lefseoppskrifter i det siste, med større eller mindre hell! Det som er viktig når ein bakar desse lefsene, er å kjevle dei så tynne som det er muleg å få til!

I dag brukte eg følgande oppskrift:

4,5 dl siktet kveitemjøl
3 dl sammalt kveite grov
2 ts bakepulver
1 ts salt
2 ss feitt (smør, olje)
2,5 dl lunka vatn


Bland mjølet og bakepulveret saman med saltet. Eg brukte fullkorn kveitemjøl for å få lefsene litt grovare. Så brukte eg omlag halvparten sammal kveite grov og fin. Bland feittet saman med vatnet og bland saman med mjølet. Rør saman til deig, og ta den på bakebordet for å kna den skikkeleg saman. rull ut deigen til ei pølse, og del den opp i åtte jamne delar. La deigen kvile eit kvarters tid, før du kjevlar det ut til lefser - aller best så runde som muleg!

Steik dei på ei varm usmurt steikepanne, omlag eit minutt på kvar side - eller gjer som eg: Steik dei på ei steiketakke på høg varme omlag eit minutt på kvar side!


Tortillalefsa på steiketakka!


Lag ein supersuper salat å ha ved sidan av saman med rømme og hakka raudlauk! Betre kan ikkje fredagstacoen bli!!!



Eg pleier alltid å blande alle salatindgrediensane saman til ein salat, men det er jo ei smakssak! Dagens salat var av ruccola, purre, stangselleri, tomat, paprika, agurk, mais og ananas.



DRIKKE!

Kva ein skal drikke til tacoen er jo ei smakssak, og ofte avgjort av kven ein et saman med. Eg et saman med ungane mine, og velger derfor vekk drikke med alkohol. I det siste har eg imidlertid fått auga opp for den velfylte hylla med alkoholfritt øl som Bunnpris på Sunndalsøra har! Både Clausthaler og Munkholm har kommen i boks i tillegg til flaske, og Munkholm har til og med utvida sortementet med fleire smakar! Dette synes eg er så bra, at eg gir det herved ein porsjon redaksjonell omtale og reklame!!! 



Det er mange som seier at skal ein drikke alkoholfritt øl, kan ein like så godt drikke vatn! Det er eg ikkje sams i!Som KrF-politikar er eg opptatt av at det skal finnast gode alkoholfrie alternativ å drikke, og at ein skal skåne born frå å sjå vaksne sitje å drikke! Viss det alkoholfrie ølet har ein like så god smak som det alkoholhaldige, er det ingen grunn for å velgje alkoholhaldig framfor alkoholfritt! Eg drikk dette stort sett til mat i helga, og klart smaken er viktig.
I kveld drakk eg ein boks av eit utanlandsk merke som heiter Estrella - som er sponsor av FC Barcelona! Sponsorar eller ei: Smaken var absolutt ikkje bra nok! Denne kjem eg ikkje til å kjøpe igjen! Derimot har eg smakt før, og gler meg på å smake igjen Hansa Pilsner Null %. Den er velsmakande både som matdrikk og kosedrikk!



Med dette på hjartet, er det berre å ønskje alle ei mat- og drikkeglad helg!!!







Etiketter