Three minutes of fame :)

Det heile starta ein morgon for nokre veker sidan mens eg sysla med noko på loftet. Då streifa journalist Roar Halten i NRK Møre og Romsdal tankane mine.

Eg er ikkje så veldig overtruisk, og trur iallfall ikkje på vardøger, men forunderleg nok er det slik at om eit menneske plutseleg dukkar innom tankane, høyrer eg frå vedkommande eller møter han/ho i løpet av få dagar.
Då eg kom ned frå loftet, gjekk eg bort til telefonen for å sjekke den. Kven andre enn Roar Halten låg det melding frå på facebook?
Han: "Hallo, er du der?" Eg: "Eh, kor hen?" Han: "Hehe, her i internett". Jaudå, eg var vel i internettet. Han skulle ha prata med meg. Om eg kunne tenke meg å stille opp på eit lite miniportrett til Sommeråpent i NRK... Eg hadde det eigentleg veldig travelt, for eg venta besøk same dag, og huset trong vasking. Men det var berre den dagen han kunne, så då vart vi einige om at Roar skulle kome innover frå Kristiansund. For eigen del var det berre å hive seg rundt i ekspresstempo med husarbeidet.
Innslaget skulle vere eit treminutters innslag. TRE TIMAR tok det å lage det!!! Men det var verd det! Same dagen la eg ut eit bilde av eit svart tøynett med reklame for NRK på. Det var "turpremie", men eg skreiv jo ingen ting om korfor eg hadde fått den :)

Turpremie :)

Så er jo alltid det journalistiske spørsmålet: Kor skal fokusområdet liggje? I utgangspunktet var tanken at det skulle liggje på stikk ut-turane, og når eg snakkar om turmål og plassering på slutten av innslaget, er det stikk ut-plasseringa det er snakk om. Og der er målet sjølvsagt å vere blant dei 200 beste!
Eg er veldig glad for at Roar Halten bestemte seg for at fokuset vart plassert på mitt utgangspunkt for alle turane: At det er ein del av det å bli frisk frå det eg har vore gjennom. At turane er eit middel for å ta meg sjølv vidare som menneske.

Siste veka har eg fått overgått meg sjølv, og eg har bestege to toppar på 11-1200 meter. Det har gitt meg trua på at eg får det til. No ventar nok fleire slike toppar i vekene framover. Eg har kryssa ut alle turane på stikk ut-kartet i Sunndal. No skal alle turane i Nesset kryssast ut!

Kva som ikkje kom med på innslaget: At eg skrytte av Fale 4H som driftar stikk ut-turen til Kongelhjellan. Og at eg sa som kultursjef Ole Magne Ansnes seier: Stikk ut gir mykje folkehelse for ein liten skjerv pengar!

Så ein ting til slutt som er viktig for meg: Korfor eg stilte opp på dette innslaget på tv:
Viss eg kan få vere eit førebilde for andre som har ein lang veg å byggje seg opp, synes eg det er bra. Viss andre kan bli oppmuntra til å finne vegen ut i naturen fordi eg har snakka om det, er det supert. For meg har det handla om å starte i det små, for så å auke på. I fjor snakka eg om å gjere toppturar, men det måtte gå eit år før eg var i stand til å gjere det. Det er dei små, men gode skritta som tels! Overvinn dine eigne frykter!

Programmet finn du her :)

Turblogg: Hels på mi nye turvenninne :)

"Så, der er du", tenkte eg om morgonen då eg køyrde forbi Mjølkill på veg mot det som skulle vere turmålet for dagen. "I dag skal vi bli vener," tenkte eg, og skoda over mot Flånebba.

Du veit du har blitt i overkant hekta på tur, når du står på di ny venninne, Flånebba, og skoder over til naboen til venninna, Smisetnebba, og tenker: "Beklagar, det vart ikkje i dag... eg kjem til deg snart - då blir vi og venner".

Eg hadde vore så heldig at eg kunne slutte meg til eit større turlag av folk på leir på Solhøgda. Dei hadde Flånebba, 1147 moh, som turmål på fredag. Eg rekna med dei ville halde mitt tempo - det er ikkje spesielt høg fart.
Det er faktisk eit poeng å ikkje halde for høg fart. Vegen er lang - mesta 5 km i oppoverbakke. Det gjeld om å posjonere ut kreftene.

Startpunktet på Rødset på Ålvundeid. Mange timar på tur ligg foran.

Utsikt mot Ålvundfjord. Til venstre ligg Seljebøvatnet.

Dette bildet er tatt på eit naturleg stoppunkt på turen. Ein treff på ein stor varde, og rett ved er det ei elv ein kan fylle opp flaska med ferskt vatn.
Det som er fint med turen, er at det går nokså jamnt oppover, ingen store, bratte stigningar. Turen er utruleg lett tilgjengeleg for alle som vil gå.
Oppover heile lia er det no mykje blåbær, og når det røyna på, var det veldig greit å putte inn nokre bær. Det er fleire bekkar med vatn undervegs, men dei er litt spreidde. Vi hadde tur med veret - 18-20 grader, stort sett overskya og litt vind. Det betydde ingen fluger og knott. Ganske perfekt turver! Men det var viktig å ha vatn i flaska på oppovertur.

Oppover går det mot Nebbvatnet, som ligg på ca 950 moh.

Fortsatt på veg oppover mot Nebbvatnet.

Ein særdeles god ting med stien opp til Flånebba, er at sjølv om stien ikkje er merka med T-måling oppover, så er den lett å få auge på, og det er ganske logisk kor ein skal. I så måte er det ein tur ein kan gjere aleine, men eg vil no kanskje ikkje oppmode folk til å gå aleine slik utan vidare.

Jammen møtte vi ein liten frosk på turen og :) 

Snart oppe ved Nebbvatnet: Utsikt mot Øksendal.

Nebbvatnet 950 moh - 200 høgdemeter igjen. Ein halvtimes gange vart vi lovt. Flånebba rett fram.

Kor lang tid brukte vi på turen?
Det er eigentleg ikkje så nøye, for det er viktig å huske på at det ikkje berre er turmålet som er målet. Turen er minst like viktig som målet.
På turen til Blåfjellet søndag begynte eg å stresse for å ikkje kome for langt bak, stigninga var langt tyngre enn til Flånebba, og dermed vart eg sliten. Enormt sliten. For å kome opp måtte eg spørre bror min om å ta sekken dei siste høgdemetra.
På fredagsturen hadde eg ingen bror eg kunne spørre... Dermed var det å pakke sekken fornuftig (med klede og mat - ingen kamera!), og satse på at det ville halde heilt opp med krefter. Det gjorde det! Det heldt rikeleg! Snakker om boost av å gå!

JAAA! Eg er på toppen! Min andre topptur på under ei veke!!! Innerdalstårnet ligg langt borte i bakgrunnen.

Heile gjengen som kom seg opp - 20 i talet! Slettes ikkje verst!

Varden på biletet vart bygd ferdig i fjor, i 2015, av to karar frå bygda. Postkasse med stikk ut-boka og ei vanleg gjestebok ligg der. Flånebba er eit populært turmål, og det er slettes ikkje rart. Alle som har vilje til å gå, kjem seg opp. Det handlar om tid. Det handlar om gode sko. Og det handlar om å ha med nok mat (godt med karbohydratar!) og drikke.
Turen er forresten stikk ut!-tur, og der kan du sjå kotekartet for turen.

Eg har fått meg ei ny venninne - ho heiter Flånebba :)

Utsikt over mot Jordalsgrenda, Meisalstranda, Eidsøra og Sunndalsfjorden. Ein ser Meisalvatnet oppe i høgda.

Sunndalsfjorden med Sunndalsøra til venstre og Øksendal til høgre. Flåøya i framgrunnen.

Jordalsgrenda og Mjølkill og vegen opp til Trolltind-området.

Åh, det heldt hardt. Smisetnebba må vente til ein annan dag. Eg skal tilbake!

Utsikt mot Ålvundfjord og Kvanne - Rykkjem-ferga.

Eg kostar rett og slett på meg ein selfie med utsikt vestover mot Nesset og Gjemnes.

På veg nedover tok turgjenget ein annan veg, som det heiter i Skriften. Det var ikkje fordi det lurte farar undervegs, men fordi vegen skulle gå forbi Rødsetsetra. I staden for å skrå over Rødsetelva langt oppe i lia, fulgte vi same sida nedover og litt "hit og dit" - vanskeleg å forklare når ein ikkje er kjent.

På veg nedover mot Rødsetsetra.

Reidun Bjorland Rødset kokte kaffe til heile gjengen som kom frå Flånebba.

Ein liten selfie til med Rødsetsetra og Ålvundeid i bakgrunnen.

Turen til Flånebba gav meg mulegheit til å kjenne på den indre turgleda. Det gav meg mulegheit til å kjenne at eg ville lenger. Han skjønte det, han Hallvard, som inviterte meg med på turen: "Det heldt vel hardt, Ingunn, når du såg over til Smisetnebba?" Ja - det heldt veldig hardt. Det tar 1 - 1 1/2 time å gå imellom toppane. Det er lurt å starte litt tidleg på dagen, slik at ein har god tid og slepp å slite seg ut.
Eg velte altså å droppe turen over til Smisetnebba, fordi eg velte å vere sosial med dei andre deltakarane på turen. Eg er kjempeglad for at eg fekk vere med - tusen takk til Hallvard Magerøy som nemnte det for meg :)

Rødsetsetra er til fri nytte for alle som går forbi.

PS! Vi brukte 4 timar opp - med andre ord ikkje noko superfart! Eg trur det var derfor så mange kom opp. I denne farta kan og ungar komme seg godt opp til toppen - sjølv om det er litt klatring heilt øvst.

Coldplay og falafel er sant

Musikk og mat begynner på same bokstav. Det trur ikkje eg er tilfeldig... mmmm... :)

Det er spesielt ein ting som betyr enormt mykje for meg, og det er å kunne lytte til musikk. Då blir eg glad til sinns, musikk er balsam for sjela.
I begynnelsen av juli var eg på konsert med favorittgruppa over alle favorittar - Coldplay - i Stockholm. I forkant av konserten måtte vi ha mat, og hamna på ein libanesisk restaurant på kjøpesenteret ved sidan av Friends Arena, kor konserten skulle vere.

Der var ikkje valet av mat vanskeleg. Eg har smakt den vegetariske retten falafel eit par gonger på IKEA, og hadde lyst å spise den på skikkeleg vis. Og kva passa betre då vi besøkte den libanesiske restauranten SOOK, som ligg i kjøpesenteret ved sidan av Friends Arena. Falafel er mat frå Midt-Austen. På restauranten fekk eg velje mellom bulgur, couscous og ris, og eg velte bulgur, for det hadde eg knappast smakt.
Og eg vart ikkje skuffa! Prisen var ikkje dyr - 105 svenske kroner, og maten var særdeles god.
Det gjorde at eg hadde lyst å prøve å lage dette sjølv då eg fekk besøk av venner litt seinare i månaden.

Ingrediensar eg måtte skaffe: Kikertmjøl, kikerter, bulgur og tahini.

Oppskrifter vart googla fram, og her er det eg laga:

FALAFEL: Oppskrift henta frå www.matpaabordet.no

2 bokser kikerter i lake
1/2 lauk finhakka
1 kvitlaukfedd finhakka/knust
1 ss finhakka persille
2 ss finhakka koriander
1/4 ts cayennepepper
1/2 ts spisskummin
1/2 ts malt koriander
1/4 ts kardemomme
1/2 ts bakepulver
1 ts salt
1-3 ss kveitemjøl eller kikertmjøl
sesamfrø
olje til steiking

Framgangsmåte:
Hell av laken frå kikerta. Bland erta saman med lauk, kvitlauk, persille og koriander. Bruk food processor eller kjøttkvern til å mose saman blandinga. Den skal vere grov og samanhengande deig. Tilsett salt, bakepulver og krydder. Ha så i mjøl/ kikertmjøl (om du brukar kikertmjøl, blir den glutenvenleg). Mengda mjøl må ein kjenne seg fram på. Om ein har for lite mjøl i deigen, vil bollane ein skal lage, smuldre opp når ein steiker dei. Ein må derfor prøve seg fram på kor mykje mjøl ein treng å ha oppi.
MEN: Deigen skal stå og kvile i kjøleskåpen ein times tid, så det er først når du tar han fram for å steike bollane at du må finne ut akkurat kor mykje mjøl det skal vere.
Bruk ei spiseskei for å lage bollar i handa. Prøvesteik ei bolle for å sjå om deigen har nok mjøl.
Form resten av deigen til bollar og dypp dei i sesamfrø før du steiker dei i rikeleg med olje.
Bollene skal spisast varme, og dei kan og frysast.

Så til det ein kan ha attåt falafelbollane.

HUMMUS: Oppskrift henta frå www.kjoekkentjeneste.blogspot.com

Hummus er og mat frå Midt-Austen. Det er laga av kikerter som hovudingrediens. I tillegg er det tahini i den, og det er sesampasta. Eg fekk kjøpt det på LIFE-butikken her på Sunndalsøra.

1 boks kikerter i lake (t.d. frå Go Green)
olivenolje
saft frå ein halv sitron
1-2 kvitlaukfedd revet på rivjarn
Spisskummin
eit par skeier tyrkisk yoghurt eller matyoghurt
tahini
paprikakrydder
chili eller cayennepepper
ev. salt

Skyll erta før du skal bruke dei. Bland kikerter og yoghurt i ei bolle og køyr det glatt med t.d. stavmiksar. Tilsett den knuste kvitlauken, spisskummin, sitronsaft, tahini og olje. Smak til med chili/ cayenne, paprikakrydder og salt. Strø litt paprikakrydder på toppen og strø over litt hakka persille.
Hummus kan serverast saman med ulike typar kjøt, og kan og brukast som grønsakdip.

BULGUR MED GRØNSAKER OG KRYDDER: Oppskrift henta frå lisevonkrogh.wordpress.com

1 stor kopp bulgur
2 ss rapsolje
2 gulerøter revne
1 ts spisskummin
1/4 ts kayennepepper
1 paprika finhakka
4 dl spinat (ca ein pose fersk)
2 vårlauk finhakka
salt og peppar

Kok opp to koppar vatn (den same som du målar opp bulgur med). Hell i bulgur og la det koke til vatnet er vekke, det tar rundt eit kvarter på svak varme med lokk på kaserollen.
Varm opp olje i steikepanne, og ha i gulerøter, spisskummin og kayennepepper. La det frese i eit par minutt før du har oppi bulgur, spinat og vårlauk. Rør godt rundt og la det stå og trekke under lokk på middel sterk varme ei lita stund. Når spinaten er mjuk, er retten ferdig. Smak til med salt og pepper og eventuelt litt meir kayennepepper.

Ha nokre falafelbollar, hummus og bulgur på fatet, og legg over litt rømme på toppen. Smakar ganske så fortreffeleg ! Eg brukte ganske lang tid på å lage dette, men med trening så blir tida kortare. Smaksmengden må ein arbeide seg fram til. Nokon likar sterk smak og nokon likar det med litt mindre smak.

Bon appetit :) Til maten hadde eg ananasbrus frå Oskar Sylte.

Sidan det trass alt var konsert med mine favorittar over alle favorittar, Coldplay, eg skulle på konsert med, legg eg med ein liten videosnutt med dei :) Konserten var heilt fantastisk!!!

Coldplay og falafel = sant <3

Turblogg: Endeleg vart det min tur :)

 

Endeleg vart det min tur å bli tindebestigar! Eg har latt auga kvila utover heile Nordmøre og Romsdal! Dagens mål var Blåfjellet og Blånebu på 1192 moh.

NB! Redigert inn fleire bilde frå turen søndag 10.september 2017.

Klart for start på Meisalvatnet. Her er utgangspunkt for mange turar. Blåfjellet i bakgrunnen.

Utgangspunktet for turen i dag var at han var sett opp som ordførartur. Det tenkte eg var eit godt høve for endeleg å kome meg til denne tinden som har stått på stikk ut!-kartet i fleire år. Eg tenkte og at det var eit godt utgangspunkt for å kome i gang med topptursesongen min. Den har eg snakka om ei god stund no.

Eg skjønar eigentleg at det berre har vorte med praten, for toppturar er tyngre enn vanlege turar. Det krevst meir på ein raud tur med minst 600 meters stigning. Så eg er glad eg har utsett den sesongen så lenge som muleg.

Turen startar i slakt terreng. Første gongen eg gjekk turen, var det veldig blautt på myrene. I 2017 har det vore gjort godt dugnadsarbeid, og det er lagt ut fleire bruer der det er som mest blaut myr. Dermed er det tørt og fint heile vegen når det har vore ein lang tørrversperiode.

Stien er lett å fin å gå opp til rundt 850 meters høgd. Derifrå går det oppover og oppover, men det er 350 effektive, korte høgdemeter. Skal ein ha med ungane på topptur, kan ein gjere denne turen.

Du kan lese meir om turen på Moroturs sider.

Fjellet kler seg i haustfargar i september, det gjer også Blåfjellet.

Turen startar i slakt terreng.

Utsikt har ein heile vegen på turen. Dette er ein flott tur for ungar med ei fin utfordring for å komme seg opp.

Og oppover går det dei siste 350 høgdemetra.

Kjekt å ha med onkel som godt turselskap :)

Mitt motto på tur er: Kor hen eg er i verda, vis meg kortaste vegen heim :) Den går i direkte line rett bak meg.

Her er fjella tydelegare å sjå enn på bildet av meg. Fjellet i framgrunnen er Vardfjellet. I rekke nr 2 ligg Goksøyra (turen til Goksøyra kan du lese om her), og bak Goksøyra ser ein Breifonntinden, Sjøvdøla, Gjuratinden saman med fleire toppar eg ikkje er sikre på. Men eg trir eitt av dei bakerste fjella er Kyrkjetaket i Isfjorden.
Turen gav rom for ei fantastisk utsikt over store delar av Romsdal og Nordmøre. Vi såg til Rauma, Molde, Gjemnes, Averøy, Tingvoll, Sunndal, Surnadal, Halsa. Dei med gode auge greide å sjå heilt ut til vindmøllene på Smøla! Det vil seie at ein såg tvers over Halsa og Tustna. Reinsfjellet stod i vegen for utsikta til Kristiansund.

For øvrig kan du lese meir om turen til Blåfjellet og Blånebu, steinbua kor du kan ta ei overnatting om du vil, kan du lese meir om på stikk ut!s nettsider.

Sommar: Utsikt utover Langfjorden - heilt ut til Sekken og Veøya.

Haustbilete av same utsikta.

Midt i bildet ligg Svarttind, kor eg fortalte om turen for eitt år sidan.

Sommar: Utsikt utover Nordmøre. I framgrunnen er Sunndalsfjorden med Rotås og Ballstad. I bakgrunnen er Tingvoll. Fjella bakerst høyrer til Aure kommune - Tustnastabbane midt i bildet.

Samme området i september. Viss du zoomar, ser du Smøla og vindmølleparken midt i bildet - til venstre for Tustnastabbane.

Tenk å ha ei slik panoramautsikt på turen :)

Her er det utsikt over Sunndalsfjorden mot Hanemsvatnet, Meisingset og Vågbø i Tingvoll. I bakgrunnen er mellom anna Strengen som ligg på Kvanne i Surnadal. Den turen fortalte eg om her. Fjorden i bakgrunnen er Ålvundfjorden,

Reinsfjellet, til høgre, er lett å få auge på frå heile Nordmøre og ein del av Romsdal. Her kan du lese om turen dit.Til og med vi ved Eikesdalsvatnet kunne såvidt skimte Reinsfjellet, og det var og derifrå vi hadde tv-signala våre. Den er og på stikk ut!-kartet (i 2016 - ikkje 2017). Fjorden mot venstre er Batnfjorden og Gjemnessundet. Ein kan sjå Gjemnes kyrkje, og ein kan skimte Averøy baki der og.

Reinsfjellet sett på avtand utan zoom.

Det er no ein gong slik at turen blir både lettare og trivelegare å gå når ein får gå i lag med trivelege folk. Gunhild og Ola Jakobsen er så absolutt i gruppa av trivelege folk, og dei fortener ein plass i bloggen :) Gode førebilete for eldre menneske som er dyktige på å gå turar og halde seg i form. Ola er vaksen opp på Bugge, og i oppveksten for han og fiska i tjernet ein kan sjå til venstre i bildet.
Tilføying september 2017: Trur du ikkje eg møtte desse to sprekingane oppe på Blånebu?!

No comments! Ganske fornøgd med eigen innsats!

Yes! Høgderekord for denne guten her! Første topptur med ungane. Taket på Blånebu måtte prøvast.

Sjølvie med fjella heimover i bakgrunnen. Ein ser Åbittinden, Skjorta, Goksøyra og Breifonntinden ganske tydeleg.

Hausten er utvilsomt den finaste tida å vere i fjellet <3

Tid for å gå ned att same vegen.

Ein liten kvil på heimovertur på ei av dei fine bruene som er laga i sommar.

Som ein oppvarmingstur til søndagens fjelltur var bror Terje og eg på ein kveldstur til Myrsetvarden. Vi gjekk opp frå garden Myrset i Eidsvåg, men du kan og starte ved Meisalvatnet kor ein startar mot Blåfjellet. Då sparar ein seg for mykje stigning, men ein sparar seg jo og for verdifull trim - og det var vel ikkje meininga?
Broderen og eg rakk att sola, som stod til venstre for Reinsfjellet. Det var ein utruleg nydeleg kveld, temperaturen var 17-18 grader, og eg kjente at det var ein maksimal oppstartar til søndagsturen!

Her startar turen til Myrsetvarden, som ligg midt på bildet i toppen. Ein utruleg flott tur!

Poenget med turen er å skrive seg inn i boka - stikk ut!-boka :)

Broderen på Myrsetvarden laurdag kveld i rundt kl 22.30. Reinsfjellet i bakgrunnen.

Utsikt utover Sunndalsfjorden. 

Utsikt mot Eidsvåg og Langfjorden